कपिलवस्तुमा आँखाको बिरामी संख्यामा वृद्धि

कपिलवस्तु । कपिलवस्तु जिल्लामा दृष्टिविहिनताको अवस्था डरलाग्दो देखिएको छ । जिल्लाका दशवटा पालिका गरिएको जाँचबाट आँखाको बिरामी संख्यामा वृद्धि भएको देखिएको हो । नेपाल नेत्रज्योती संघको आँकडाअनुसार जिल्लामा आँखाको बिरामीहरूको संख्या उच्च देखिएको छ ।

आँखा रोगका बिरामी बढेपछि दृष्टिविहीन हुनेको संख्या पनि बढ्दै गएको छ । जिल्लामा शिवराज नगरपालिकामा सबैभन्दा बढी आँखाको विरामीहरू रहेको पाइएको छ । शिवराजमा १ हजार ६ सय ७९ जना आँखाको बिरामी रहेको तथ्याङ्कमा देखाइएको छ ।

यस्तै वाणगङ्गा नगरपालिकामा १ हजार ६ सय २४ जना, बुद्धभूमि नगरपालिकामा १ हजार ४ सय २९, कृष्णनगर नगरपालिकामा १ हजार ३ सय ७८, महाराजगञ्ज नगरपालिकामा १ हजार २ सय ६ जना आँखाको बिरामी रहेको तथ्याङ्कमा उल्लेख छ ।

यस्तै जिल्लाको मायादेवी गाउँपालिकामा १ हजार ६१ जना, शुद्धोधन गाउँपालिकामा ९ सय ९४, यसोधरा गाउँपालिकामा ८ सय १३ र विजयनगर गाउँपालिकामा ८ सय १३ जना आँखाका बिरामीको पहिचान भएको नेपाल नेत्र ज्योती संघ आँखा स्वास्थ्य कार्यक्रम राप्ती तथा बहादुरगञ्जका प्रमुख प्रशासकीय अधिकृत शमशेर थापाले जानकारी दिए ।

थापाले विभिन्न समयमा गरिएको जांँचबाट बिरामीको तथ्याङ्क प्राप्त भएको बताए । उनले सबै बिरामीको शल्यक्रियाबाट उपचार गर्नुपर्ने समेत बताए । पालिकास्तरमा बिरामीहरूको उपचारको लागि सहयोगको याचना गरिरहेको समेत उनले उल्लेख गरे ।

त्यस्तै नारायणी आँखा अस्पताल बहादुरगञ्जका प्रशासकीय अधिकृत जसराज विश्वकर्माले अस्पतालले स्थापनाकालदेखि अहिलेसम्म ९ लाख ३० हजार ६ सय २२ जनाको ओपीडी परीक्षण गरिएको र १ लाख २३ हजार ७ सय ८ जनाको शल्यक्रिया गरिएको जानकारी दिए । उनले बजेटको अभावमा उपकरण खरिद गर्न नसक्दा उपचारमा समस्या सिर्जना भइरहेको पनि उल्लेख गरे ।