कपिलवस्तुमा ५७ कैदीबन्दीले मतदान गर्न पाउने

कपिलवस्तु । आसन्न मङ्सिर ४ गते हुने निर्वाचनमा कपिलवस्तु कारागारमा रहेका कैदीबन्दीमध्ये ५७ जनाले मतदान गर्न पाउने भएका छन् । कारागारका ४ सय ५० बढी कैदीबन्दी मध्ये ५७ जनाले मात्रै यसपटक निर्वाचनमा मतदान गर्न पाउने भएका हुन ।

मतदाता नामावलीमा नाम भएका कैदीबन्दीले मात्र प्रतिनिधिसभा सदस्यको समानुपातिकतर्फ मतदान गर्न पाउने निर्वाचन कार्यालयको व्यवस्था अनुसार कपिलवस्तु कारागारमा रहेका ५७ जनाको मात्रै मतदाता नामावलीमा नाम समावेश भएको र उनीहरुले मात्रै मतदान गर्न पाउने कारागारले जनाएको छ ।

कार्यालयका जेलर मनोज कुमार सैनीका अनुसार कपिलवस्तु कारागारबाट यसपटक मतदान गर्ने सबै पुरुष कैदीहरु रहेका छन् । उनीहरुलाई निर्वाचनका दिन कारागार परिसरमै अस्थाइ मतदान केन्द्र स्थापना गरी मतदानको व्यवस्था गरिने जेलर सैनीले जानकारी दिएका छन् ।