एसिया कप : श्रीलंका सगँ भारत पराजित, सुपर फोरमा भारतको दोस्रो हार

भारतले दिएको १७४ रनको लक्ष्य श्रीलंकाले १९.५ ओभरमा ४ विकेट गुमाउँदै पूरा गरेको हो । श्रीलंकाका लागि कुशल मेन्डिसले सर्वाधिक ५७ रन बनाए । त्यस्तै पथुम निसंकाले ५२ रनको योगदान गरे । त्यसैगरी दासुन शनाका र भानुका राजापक्षले नटआउट रहँदै क्रमश: ३३ र २५ रन बनाए । भारतका लागि युजवेन्द्र चहलले ३ र रविचन्द्रन अश्वीनले १ विकेट लिए ।

यसअघि टस हारेर पहिले ब्याटिङ गरेको भारतले निर्धारित २० ओभरमा ८ विकेट गुमाउँदै १७३ रन बनाएको थियो । भारतका लागि कप्तान रोहित शर्माले सर्वाधिक ७२ रन बनाए । ४१ बलमा उनले ५ चौका र ४ छक्काको मद्दतमा उक्त योगफल बनाएका हुन् ।

त्यस्तै सूर्यकुमार यादवले ३४ रन बनाउँदा ऋषभ पन्त र हार्दिक पाण्डयाले भने १७/१७ रन बनाए । पूर्वकप्तान विराट कोहली भने शून्यमै पेभेलियन फर्किएका थिए ।

श्रीलंकाका लागि दिलशान मदुशंकाले सर्वाधिक ३ विकेट लिए । त्यस्तै चमिका करुणारत्ने र दासुन शनाकाले २/२ विकेट लिए भने महेश थीक्सानाको नाममा १ विकेट रह्यो ।

भारत यसअघि सुपर फोरको आफ्नो पहिलो खेलमा पाकिस्तानसँग ५ विकेटले पराजित भएको थियो । समूह चरणको खेलमा भने भारतले पाकिस्तानलाई ५ विकेटले नै हराएको थियो ।

सुपर ४ अन्तर्गत शीर्ष २ स्थानमा रहने टिमले फाइनल खेल्नेछन् । भारतले अब बिहीबार अफगानिस्तानसँग प्रतिस्पर्धा गर्नेछ । त्यस्तै पाकिस्तानले बुधबार अफगानिस्तान र शुक्रबार श्रीलंकासँग प्रतिस्पर्धा गर्नेछ ।

सुपर ४ मा श्रीलंका २ खेल जित्दै ४ अंकसहित शीर्ष स्थानमा रहेको छ । त्यस्तै पाकिस्तान २ अंकसहित दोस्रो स्थानमा छ । अफगानिस्तान पनि सुपर फोरको आफ्नो पहिलो खेलमा श्रीलंकासँग पराजित भएको थियो ।

पाकिस्तान र अफगानिस्तानबीचको नतिजाले खेल नै भारत बाहिरिने वा नबाहिरिने टुंगो लाग्नेछ । यदि उक्त खेल पाकिस्तानले जितेमा भारतलाई झिनो आशा बाँकी रहनेछ । यदि पाकिस्तानले जितेमा भारत बाहिरिनेछ । त्यस्तै श्रीलंकाले पनि पाकिस्तानलाई हराएको अवस्था र भारतले अफगानिस्तानलाई जितेको अवस्थामा मात्रै उसको फाइनल पुग्ने सम्भावना रहन्छ ।