बड्की आइतबारी पर्वमा कपिलवस्तुका पालिकाले दिए बिदा

कपिलवस्तु सहित तराईका जिल्लामा आउँदो आइतबार थारु समुदायले बड्की आइतबारी पर्व मनाउँदै छन् । थारु समुदायको एक महत्वपूर्ण पर्वका अवसरमा कपिलवस्तुका विभिन्न पालिकाले स्थानीय बिदा दिएका छन् ।

बाणगंगा नगरपालिकाले नगरपालिका मातहतका कार्यालय तथा वडा कार्यालयहरु र स्वास्थ्य संस्थाहरुका लागि बिदा दिएको छ । नगर प्रमूख चक्रपाणी अर्याल र प्रमूख प्रशासकीय अधिकृत खिमानन्द भुषालद्धारा जारी सूचना अनुसार भदौ २ गतेको नगर कार्यपालिकाको बैठकबाट स्विकृत गरी आउदो आइतबार भदौ १९ गतेका लागि बिदा दिइएको हो । बाणगंगा नगरपालिकाले शैक्षिक संस्थाहरुको हकमा भने शैक्षिक क्यालेन्डर नै प्रकाशित भएकाले सोही अनुसार गर्न आग्रह गरेको प्रमूख प्रशासकीय अधिकृत भुसालले बताउनुभयो ।

यस्तै जिल्लाको शिवराज नगरपालिकाले पनि थारु समुदायले मनाउने बड्की आइतबारी पर्वको अवसरमा नगरपालिका मातहतका सबै कार्यालय तथा शैक्षिक संस्थाहरुमा बिदा दिएको छ । यस्तै मायादेवी गाउँपालिकाले पनि सो दिन बिदा दिएको छ ।

थारु समुदायले मनाउने अन्य पर्वहरु जस्तै बड्की आइतबारी पर्व पनि एक महत्वपूर्ण पर्व हो । कपिलवस्तु जिल्ला थारु समुदाय बाहुल्य जिल्ला रहेका कारण यहाँका स्थानीय तहहरुले यो पर्वमा हरेक वर्ष बिदा दिने गरेका छन् ।

बडकी आईतवारीको बिदा सम्बन्धी सूचना