नेपाली कांग्रेसको दल दर्ता जिम्मेवारी मुख्य सचिव पौडेललाई

नेपाली कांग्रेसले प्रादेशिक र संघीय निर्वाचन प्रयोजनका लागि निर्वाचन आयोगमा दल दर्ताको जिम्मेवारी मुख्य सचिव कृष्णप्रसाद पौडेललाई दिएको छ।

पार्टी केन्द्रीय कार्यालय सानेपामा शनिबार बसेको केन्द्रीय कार्यसम्पादन समितिको बैठकले दल दर्ताको जिम्मेवारी मुख्य सचिव पौडेललाई जिम्मेवारी दिने निर्णय गरेको हो।

बैठकमा सहभागी सहमहामन्त्री जीवन परियारले निर्वाचन प्रयोजनका लागि दल दर्ताको जिम्मेवारी मुख्य सचिव पौडेललाई दिने निर्णय गरिएको जानकारी दिए।

‘मुख्य सचिवले प्रक्रिया पुर्याएर दल दर्ताका लागि निर्वाचन आयोगमा कागजात लैजाने निर्णय भयो,’ बैठक पछि उनले भने।

कार्यसम्पादन समिति सदस्य अर्जुननरसिंह केसीले दल दर्ताको निर्णयबाहेक बैठक कुनै नयाँ विषयमा प्रवेश नभएको जानकारी दिए।

‘पालिकाका निर्वाचित जनप्रतिनिधिहरुको अभिमुखिकरण र स्वागत कार्यक्रम छ, त्यसका बारेमा अलि चर्चा भयो,’ उनले भने, ‘अरु कुनै पनि गम्भीर विषयमा छलफलका लागि प्रस्तुत भएन। नयाँ कुनै कुरामा प्रवेश गरेको छैन।’