योग दिवस : युनाइटेडमा बालबालिकालाई गराइयो योग अभ्यास

ई—साझाकुरा,कपिलवस्तु । अन्तराष्ट्रिय योग दिवसको अवसरमा मंगलबार कपिलवस्तुका विभिन्न क्षेत्रमा योग अभ्यास तथा यससँग सम्बन्धित विविध कार्यक्रम गरि दिवस मनाइएको छ ।

दिवसको अवसरमा कपिलवस्तुको बाणगंगा नगरपालिका वडा नम्बर ८ स्थित युनाइटेड स्टुडेन्ट एकेडेमी विद्यालयले अध्ययनरत विद्यार्थीहरुलाई विद्यालयमै योग शिक्षा सहितको अभ्यास गराएको छ । मानव स्वास्थ्य र स्वस्थ जीवन यापनका लागी योगको आवश्यकता र महत्व आदिम मानव सभ्यतासँग जोडिएको विषय रहेकाले पनि आधुनिक विश्वमा मानवीय व्यस्तताले योगलाई अझै महत्वका साथ लिइएको छ । यस्तै विद्यालयले आठौँ अन्तराष्टिय योग दिवसको अवसर पारी आज देखि नै नियमित योग शिक्षणको पनि सुरुवात गरेको छ ।

‘मानवताका लागि योग’ भन्ने नाराका साथ मनाइएको योग दिवसका अवसरमा युनाइटेडमा अध्ययनरत करिब ४ सय बढी विद्यार्थी कार्यक्रममा सहभागि भएको विद्यालयका शिक्षक प्रेमनारायण पाण्डेले जानकारी दिनुभएको छ । शिक्षक शिव खनाल र तृष्णा तिवारीले विद्यार्थीहरुलाई योगाभ्यास गराउनु भएको थियो ।

योग व्यक्तिको शारीरिक, मानसिक र आध्यात्मिक स्वास्थ्यलाई सुदृढ गर्ने अभ्यास भएको भन्दै विद्यालयले हरेक दिन विद्यार्थीहरुलाई घरमा पनि योगको अभ्यासका लागि आग्रह गरेको छ । आधुनिक चिकित्सा पद्धतिले रोग लागिसकेपछिको उपचारमा पनि शारीरिक पक्षहरूलाई महत्त्व दिएको पाइन्छ । योग अभ्यासले मनको शान्ति, आत्मनियन्त्रण र अध्यात्मिकतामा महत्त्व दिँदै आएको छ ।
युनाइडेट स्टुडेन्ट एकेडेमीले योगलाई हाम्रो शिक्षाको अङ्गका रूपमा विकास गर्दै यसबारे हुने अध्ययन अनुसन्धानलाई थप सुदृढ बनाउँदै लैजानुपर्ने आवश्यकता रहेकोमा जोड पनि दिएको छ ।