पाँच वर्षको तलब विद्यालयलाई

बझाङ — बझाङको जयपृथ्वी नगरपालिका–१० का वडाअध्यक्ष दलबहादुर विष्ट (कृष्ण) ले आफ्नो कार्यकालमा पाएको तलब सुविधा विद्यालयलाई दिएका छन् । उनले पाँचवर्षे कार्यकालमा पाएको तलबभत्तासहितको १५ लाख रुपैयाँ सत्यवादी माध्यमिक विद्यालयलाई दिएका हुन् । उनी कांग्रेसबाट निर्वाचित वडाध्यक्ष हुन् ।

गरिब तथा जेहेनदार विद्यार्थीहरूको शिक्षामा सहयोग गर्ने उद्देश्यसहित कृष्णपुष्पा फाउन्डेसनको नाममा छात्रवृत्ति दिने गरी अक्षयकोष स्थापना गर्न उनले उक्त रकम विद्यालयलाई दिएको बताए । विष्टले शुक्रबार उक्त रकम विद्यालयलाई हस्तान्तरण गरेका हुन् । निर्माण तथा होटल व्यवसायीसमेत रहेका विष्टले आफूले विद्यार्थी हुँदा भोगेको आर्थिक अभाव गरिब विद्यार्थीले भोग्न नपरोस् भनेर पाएको सुविधा विद्यालयलाई दिएको बताए । राज्यले दिएको सेवा सुविधा जति सबै आफूले अध्ययन गरेको विद्यालयको कोषमा जम्मा गर्न पाउँदा गौरवको अनुभूति भइरहेको उनले बताए ।

‘मैले राजनीतिलाई सेवा गर्ने अवसरका रूपमा लिएको छु । पैसा कमाउनेभन्दा पनि जनताको सेवा गर्ने अवसर पाएँ, यो मेरा लागि सन्तुष्टिको विषय हो,’ उनले भने, ‘मलाई परिवार चलाउने मेरो व्यवसायबाट पुगेकै छ । पढाइ खर्चकै अभावले कसैले शिक्षाको उज्यालोबाट वञ्चित हुन नपरोस् भनेर सबै रकम विद्यालयलाइ दिएको हुँ ।’

आफ्नो पाँचवर्षे कार्यकालमा राज्यबाट प्राप्त तलब भत्ता १३ लाखमा २ लाख थप गरेर विद्यालयलाई रकम दिएको उनले बताए । विद्यालयलाई रकम दिएर वडाध्यक्ष विष्टले ठूलो गुन लगाएको प्रधानाध्यापक रामदत्त उपाध्यायले बताए ।

वडाध्यक्षले दिएको रकमको सदुपयोग गर्ने बताउँदै उनले भने, ‘उहाँले विद्यालयलाई दिएको रकमले गरिब र जेहेनदार विद्यार्थीको शिक्षामा ठूलो सहयोग पुग्नेछ,’ उनले भने, ‘राजनीति कमाउने पेसा होइन, सेवा हो भन्ने उदाहरण उहाँले प्रस्तुत गर्नुभएको छ ।’ विष्टले दिएको रकम विद्यालयको अक्षयकोषमा राखिने र त्यसवाट आएको ब्याजले विद्यार्थीलाई छात्रवृत्ति प्रदान गरिने उनले बताए ।

84

प्रतिक्रिया

खबर सबै

नेपालको बाढी : विश्व समुदायले अब जिम्मेवारी लिनुपर्छ

लुम्बिनी प्रदेश सबै

जसपाको कारबाहीले लुम्बिनी सरकार संकटमा, मुख्यमन्त्रीलाई फेरि विश्वासको मतको दबाब

साझा अपडेट

MENU