कपिलवस्तुको बाणगंगाबाट भरुवा बन्दुकसहित दुई जना पक्राउ

राजेन्द्र खनाल, कपिलवस्तु ।
कपिलवस्तुको बाणगंगाबाट अबैध भरुवा बन्दुकसहित दुई जना पक्राउ परेका छन् । बाणगंगा नगरपालिका वडा नं.२ कोठीखोला किनारबाट भरुवा बन्दुकसहित उनीहरुलाई प्रहरीले पक्राउ गरेको हो ।

मनकामना सामुदायिक वनमा केही व्यक्ति बन्दुकसहित हिडिरहेको भन्ने गोप्य सुचनाको आधारमा ईलाका प्रहरी कार्यालय पिपराबाट खटिएको प्रहरीको टोलीले उनीहरुलाई पक्राउ गरेको प्रहरी निरिक्षक दिनेश गुरुङले बताउनुभयो ।

पक्राउ पर्नेमा अर्घाखाँचीको शितगंगा नगरपालिका वडा नं.१४ निवासी ५० बर्षीय बीर बहादुर सोमै र सोही वडाका २८ बर्षीय खेमु मगर रहेका छन् । सोमैको साथबाट एक थान खाली भरुवा बन्दुक र मगरको साथबाट एक थान लोडेड भरुवा बन्दुक फेला परेको प्रहरीले जनाएको छ । उनीहरु विरुद्ध थप अनुसन्धान सुरु गरिएको इलाका प्रहरी कार्यालय पिपराले जनाएको छ ।

हरितयार बरामदमा इलाका प्रहरी कार्यालय पिपराको सफलता

यस अघि पनि बाणगंगाको वडा नम्बर ८ को मोर्मी स्थित कोइलीपारबाट चार थान भरुवा बन्दुक सहित तीन जना मानिसहरुलाई पक्राउ गरी मुद्धा चलाएको र बाणगंगा कै वडा नम्बर ७ धैरेनी डाँडाबाट समेत दुई वटा लोड गरी राखिएको भरुवा बन्दुक फेला पारी बरामद गरेको प्रहरी निरिक्षक गुरुङले बताउनुभयो । यस्तै कपिलवस्तु नगरपालिका वडा नम्बर १० बाट मेड इन युएस ए लेखेको अटोमेटिक पेस्तोल, चार राउण्ड गोली सहित एक जनालाई पक्राउ गरी मुद्धा चलाइएको पनि उहाँले बताउनुभयो ।
घरेलु हतियार देखि अन्य विभिन्न हातहतियारको खोजी र नियन्त्रणमा प्रहरी लागेको र यसमा केही सफलता समेत मिलेको उहाँको भनाई छ । ईलाका प्रहरी कार्यालयबाट राजश्व संकलनमा समेत राम्रो सफलता प्राप्त भइरहेको उहाँले बताउनुभयो ।