लाइसन्सको ट्रायल सेन्टर र कर बुझाउन कपिलवस्तुमा सेवा कार्यालय खोल्ने तयारी

राजेन्द्र खनाल, कपिलवस्तु ।
लुम्बिनी प्रदेश सरकारको श्रर्म,रोजगार तथा यातायात व्यवस्था मन्त्रालले कपिलवस्तुमा यातायात व्यवस्था सेवा कार्यालय स्थापनाको तयारी गरेको छ ।
कपिलवस्तु र अर्घाखाँची जिल्लालाई लक्षित गरी कपिलवस्तुमा सेवा कार्यालय स्थापना गर्ने गरी मन्त्रालयले तयारी गरेको श्रम रोजगार तथा यातायात व्यवास्था मन्त्रालयका सचिव दिपकराज नेपालले जानकारी दिए ।

स्थान निर्धारण गरी कपिलवस्तुमा कहाँ कार्यालय स्थापना गर्दा ठिक हुन्छ भन्ने विषयमा मन्त्रीपरिषद् बैठकमा छलफल भई स्विकृत भएपछि छिट्टै कार्यालय स्थापना गरी काम थालिने नेपालले बताए । अहिले मन्त्रालयले कपिलवस्तु र अर्घाखाँची जिल्लालाई लक्षित गरी कार्यालय स्थापनाको तयारी तिव्र रुपमा भईरहेको सचिव नेपालले बताएका छन् । कपिलवस्तु सँगै प्रदेश सरकारले नवलपसारीमा पनि यातायात व्यवस्था सेवा कार्यालय स्थापना गर्ने छ ।

कपिलवस्तुमा सो कार्यालय स्थापना भए सँगै यातायातको कर तिर्न, नविकरण गर्न, सवारी चालक अनुमती पत्र नविकरण र नयाँ चालक अनुमति पत्र लिनका लागि रुपन्देही धाउन पर्दैन । कार्यालय कपिलवस्तुको सदरमुकाम क्षेत्र तौलिहवामा स्थापना गर्ने वा बुद्धभुमि नगरपालिकाको गोरुसिँगेमा स्थापना गर्ने भन्ने विषयमा छलफल चलिरहेको बताएको छ । मुख्य सेवा कार्यालय सदरमुकाममा स्थापना भए सवारी चालक अनुमति पत्रको ट्रायल सेन्टर भने खुला स्थानको राजमार्ग क्षेत्रमै स्थापना हुन सक्ने मन्त्रालयका सचिव नेपालले बताए ।

यातायात व्यवस्था कार्यालयको सेवा क्षेत्र कपिलवस्तुमा पनि विस्तार हुन लागे सँगै जिल्लाका राजनितिक दलका शिर्षस्त नेताहरुले आफ्नो क्षेत्रमा कार्यालय स्थापना हुनुपर्ने विचारसहित तानातानको स्थिति समेत सुरु भएको छ । कपिलवस्तुमा कार्यालय खोल्ने विषय राम्रो रहेको बताउँदै दलहरुले अर्घाखाँची र कपिलवस्तुका सबै नागरिकहरुलाई पायक पर्ने स्थानमा कार्यालय बनाउनुपर्ने उल्लेख गरेका छन् ।

255