गुल्मी
लुम्बिनी प्रदेशको गुल्मी जिल्ला स्थित रिपमुलढुंगा सामुदायिक वनमा लागेको आगो बस्तीमा पस्न थालेपछि निभाउने क्रममा चारजना घाइते भएका छन्।
धुर्कोट गाउँपालिका वडा नम्वर ६ रजस्थल दाद्रामा लागेको आगो बस्तीमा पस्न थालेपछि निभाउने क्रममा स्थानीय ३५ वर्षकी पुतला पाण्डे र २५ वर्षकी सीता सुनारको टाउको र हातमा बढी जलेकाले उनीहरूलाई उपचारका लागि पाल्पा पठाइएको जिल्ला प्रहरी कार्यालय गुल्मीका प्रहरी नायब उपरीक्षक पुरुषोत्तम पाण्डेले जानकारी दिए।
यस्तै, २१ वर्षकी विष्णुमाया अर्याल र ३७ वर्षकी सरिता बञ्जाडेको स्थानीय स्वास्थ्य चौकीमा उपचार भइरहेको प्रहरीले जनाएको छ।
आगो निभाउन अहिले पनि स्थानीय र सुरक्षाकर्मीहरू जुटेका छन्। आगो अहिले बस्तीमा पस्ने जोखिम नभएको प्रहरीले जनाएको छ।
यता, रेसुंगाको वनमा पनि आगलागी भएको छ।
प्रतिक्रिया