दैवीप्रकोप उद्धार कोषमा लुम्बिनी सरकारको तीन करोड सहयोग

लुम्बिनी प्रदेश सरकारले रसुवा लगायतका जिल्लामा आएको बाढी तथा पहिरोबाट प्रभावित नागरिकको राहत तथा उद्धारका लागि प्रधानमन्त्री दैवीप्रकोप उद्धार कोषमा तीन करोड रुपियाँ सहयोग गर्ने भएको छ ।

लुम्बिनी प्रदेशका मुख्यमन्त्री चेतनारायण आचार्यले प्रदेश सरकारका तर्फबाट विपद् प्रभावित नागरिकको राहत तथा उद्धारका लागि उक्त रकम सहयोग उपलब्ध गराइने जानकारी दिनुभएको हो ।

यसैगरी, लुम्बिनी प्रदेशभित्र स्थायी रूपमा बसोबास गर्ने नागरिक विपद्मा परी मृत्यु भएमा मृतकका परिवारलाई प्रतिव्यक्ति एक लाख रुपियाँका दरले राहत रकम उपलब्ध गराइने भएको छ ।

यसैबीच रसुवा लगायतका जिल्लामा आएको बाढी तथा पहिरोमा परी लुम्बिनी प्रदेशका एक सय ८१ जना व्यक्ति अझै सम्पर्कविहीन रहेको जानकारी प्राप्त भएको प्रदेश सरकारले जनाएको छ ।

मुख्यमन्त्री आचार्यले विपद्को कठिन घडीमा प्रदेशभित्रका उद्योगी–व्यवसायी, राजनीतिक दल, नागरिक समाज, राष्ट्रसेवक, सामाजिक सङ्घसंस्था, सञ्चारकर्मी तथा आम नागरिकलाई आ–आफ्नो ठाउँबाट राहत तथा सहयोगका कार्यमा सक्रिय सहभागिता जनाउन अपिलसमेत गर्नुभएको छ ।

उहाँले विपद्को संवेदनशील समयमा अपुष्ट सूचना, अफवाह तथा भ्रामक सामग्रीको प्रचारप्रसार नगर्नसमेत आग्रह गर्नुभएको छ। आधिकारिक तथा विश्वसनीय स्रोतबाट प्राप्त सूचना मात्र सम्प्रेषण गर्न उहाँले सबैसँग अनुरोध गर्नुभएको छ ।

प्रदेश सरकारले जिल्ला प्रशासन कार्यालय, स्थानीय तह तथा सुरक्षा निकायसँग समन्वय गरी सम्पर्कविहीन नागरिकको खोजी तथा उद्धारका लागि आवश्यक पहल गरिरहेको जनाएको छ ।

त्यस्तै, नदीमा बगेर लुम्बिनी प्रदेशको पश्चिम नवलपरासीसम्म आइपुगेका शवको व्यवस्थापनमा समेत प्रदेश सरकारले आवश्यक भूमिका निर्वाह गरिरहेको जनाएको छ ।