रामबहादुर गन्धर्व, कपिलवस्तु । कपिलवस्तुको बाणगङ्गा नगरपालिका–५ अन्तर्गत विभिन्न खाजा घर, होटल तथा रेष्टुरेन्टबाट प्रहरीले ठूलो परिमाणमा घरेलु मदिरा तथा मदिरा बनाउन प्रयोग हुने कच्चापदार्थ बरामद गरी नष्ट गरेको छ ।

इलाका प्रहरी कार्यालय कोपवाका अनुसार भदौ ४ गते खुटेहनी, झन्डा–कोपवा क्षेत्रमा सञ्चालन गरिएको चेकजाँच तथा गस्तीका क्रममा १७० लिटर तयारी घरेलु मदिरा र ६० लिटर मदिरा बनाउन प्रयोग गरिने कच्चापदार्थ तथा अखाद्य वस्तु बरामद गरिएको हो ।

कार्यालय प्रमुख प्रहरी नायब निरीक्षक इन्दप्रसाद न्यौपानेको कमान्डमा खटिएको प्रहरी गस्ती टोलीले विभिन्न खाजा घर, होटल तथा रेष्टुरेन्टमा अनुगमन गर्ने क्रममा उक्त मदिरा फेला पारेको प्रहरीले जनाएको छ ।

बरामद गरिएको घरेलु मदिरा तथा कच्चापदार्थ स्थानीय जनप्रतिनिधि, स्वास्थ्य सेवा प्रमुख, विभिन्न सामाजिक सङ्घसंस्थाका पदाधिकारी, सञ्चारकर्मी, बुद्धिजीवी तथा भद्रभलाद्मीको रोहबरमा नष्ट गरिएको इलाका प्रहरी कार्यालय कोपवाले जनाएको छ ।

प्रहरीले घरेलु तथा अवैध मदिराको उत्पादन, बिक्री–वितरण तथा सेवनबाट हुन सक्ने स्वास्थ्य तथा सामाजिक जोखिमलाई न्यूनीकरण गर्न नियमित अनुगमन र कारबाहीलाई निरन्तरता दिने जनाएको छ ।