दुई दिन बिदा हुँदैमा घुम्न नहिँड्नू : आयल निगम

नेपाल आयल निगमले इन्धन खपतप्रति सचेत हुन उपभोक्तालाई आग्रह गरेको छ ।  

शनिबार र आइतबारको छुट्टीमा लामो दुरीको यात्रा तय गर्दै इन्धन खपत नबढाउन आयल निगमले आग्रह गरेको हो । 

इन्धनको कम खपतमा उपभोक्ताबाट निगमले सहयोगको अपेक्षा राखेको प्रवक्ता मनोज ठाकुरले बताए । “बिदा पायौँ  भनेर गाडी निकालेर घुम्न जानुभएन । जसरी भए पनि इन्धन खपत कम गर्ने हो । यसमा जनताको पनि योगदान चाहिन्छ”, प्रवक्ता ठाकुरले भने । 

हाल निगमलाई  पेट्रोलमा प्रतिलिटर ३४ रुपैयाँ ३६ पैसा घाटा छ भने डिजेलमा प्रतिलिटर १२० रुपैयाँ ५४ पैसा  घाटा छ । यस्तै एलपी ग्यासमा ४१६ रुपैयाँ ३७ पैसा घाटा छ । -रासस