कपिलवस्तुमा निषेधाज्ञा जारी, कुनै पनि विरोधात्मक गतिविधि गर्न रोक

कपिलवस्तुमा धारा ६(३)(क) बमोजिम निषेधाज्ञा जारी

कपिलवस्तु । कपिलवस्तु जिल्लामा सम्भावित प्रदर्शन, जुलुस, हुलदंगा तथा झडप आदिका कारण उत्पन्न हुन सक्ने अवाञ्छित अवस्था नियन्त्रण गरी शान्ति सुरक्षा कायम गर्न निषेधाज्ञा जारी गरिएको छ ।

जिल्ला प्रशासन कार्यालय, कपिलवस्तुका प्रमुख जिल्ला अधिकारी दिलकुमार तामाङले शुक्रबार एक आदेश जारी गर्दै २०८२ साल भदौ २७ गते बिहान ६ बजेदेखि बेलुकी ६ बजेसम्म निषेधाज्ञा लागू हुने जानकारी दिएका हुन् ।

निषेधाज्ञा अवधिभर पाँच जना भन्दा बढी भेला भई प्रदर्शन, नाराबाजी, धर्ना, घेराउ, जुलुस तथा सभा जस्ता कुनै पनि विरोधात्मक गतिविधि गर्न रोक लगाइएको छ ।

आदेशको उल्लंघन गर्ने वा पालना नगर्ने व्यक्तिमाथि प्रचलित कानुन बमोजिम कारबाही हुने जिल्ला प्रशासन कार्यालयले चेतावनी दिएको छ ।