२५६९औं बुद्ध जयन्ती ३ दिन मनाइँने, एक करोड बजेट

गौतम बुद्धको जन्मस्थल लुम्बिनी फेरि एकपटक वैशाख शुक्ल पूर्णिमामा भव्य उत्सवको केन्द्र बन्ने भएको छ। यसपटकको २५६९औं बुद्धजयन्ती तथा लुम्बिनी दिवस २०८२ एक करोड रुपैयाँ खर्च गरेर भव्यताका साथ तीन दिनसम्म मनाइनेछ।

लुम्बिनी विकास कोषले शनिबार पत्रकार सम्मेलन गर्दै वैशाख २८ देखि ३० गतेसम्म रुपन्देही, कपिलवस्तु र नवलपरासीमा विविध कार्यक्रम आयोजना गरिने जानकारी गराएको छ। कार्यक्रमका बारेमा कोषका उपाध्यक्ष डा. ल्हारक्याल लामाले जानकारी दिँदै भने, “बुद्धको जन्म, ज्ञान प्राप्ति र महापरिनिर्वाण एकै दिन परेको दुर्लभ संयोगलाई मनाउन यो पर्व विशेष बनाइनेछ।”

तीन दिन, सयौं कार्यक्रम

कार्यक्रममा प्रमुख आकर्षण अहोरात्र महापरित्राण पाठ, भिक्षु-भिक्षुणी सहभागी प्रार्थना सभा, शोभायात्रा, दीप प्रज्वलन, शाकाहारी महोत्सव, नाटक, शान्ति ध्यान, रक्तदानदेखि आँखा शिविरसम्मका गतिविधि रहनेछन्।

वैशाख २९ गते अन्तर्राष्ट्रिय बौद्ध सम्मेलन आयोजना गरिनेछ, जसमा प्रधानमन्त्री केपी शर्मा ओली प्रमुख अतिथि हुनेछन्। कार्यक्रमको विशेष समारोहमा संघीय तथा प्रदेश मन्त्री, प्रदेश प्रमुख, कुटनीतिक नियोगका प्रतिनिधि र विदेशी पाहुनाहरूको उपस्थिति रहनेछ।

५६९ सदस्यीय समिति गठन

उत्सवको तयारी तथा समन्वयका लागि संस्कृति पर्यटन तथा नागरिक उड्डयनमन्त्री बद्रीप्रसाद पाण्डेको संयोजकत्वमा ५६९ सदस्यीय मूल समिति गठन गरिएको छ। साथै, विभिन्न उपसमिति बनाई तयारी तीव्र पारिएको छ—जसमा शोभायात्रा, सुरक्षा, प्रचार, सरसफाइ, आतिथ्य सत्कार, भोजन, आवासदेखि मञ्च व्यवस्थासम्मका जिम्मेवारी बाँडिएको छ।

ऐतिहासिक स्थलहरूमा पनि कार्यक्रम

रामग्राम, तिलौराकोट, देवदह, कुदान लगायत बुद्धसँग सम्बन्धित ऐतिहासिक स्थलहरूमा पनि स्थानीय तहसँगको समन्वयमा कार्यक्रम हुनेछन्। विशेषगरी वैशाख ३० गते नवजात शिशु सिद्धार्थलाई मायादेवी मन्दिरबाट तिलौराकोट लगिएको ऐतिहासिक यात्राको पुनः अभिनय गरिनेछ, जुन बुद्धकालीन इतिहासको जीवित झल्को हुनेछ।

लुम्बिनी विकास कोषले बुद्धको शान्ति सन्देश संसारभर फैलाउन सम्पूर्ण लुम्बिनी क्षेत्रका नगरवासीहरूलाई दीप प्रज्वलन गर्न अपिल गरेको छ।

बुद्ध जयन्ती २०८२ न केवल धर्मिक महत्वको दिन हो, यो विश्व शान्तिको सन्देश बोकेको एक सांस्कृतिक चाड पनि बन्ने देखिएको छ।