महाशिवरात्रिमा तौलेश्वर महादेव मन्दिरमा भक्तजनको घुइँचो (तस्बिरसहित)

गुलाम अलि, तौलिहवा । महाशिवरात्रिको पावन अवसरमा कपिलवस्तुको सदरमुकाम तौलिहवामा अवस्थित ऐतिहासिक तौलेश्वर महादेव मन्दिरमा भक्तजनको घुइँचो लागेको छ। विहानैदेखि शिवभक्तहरू मन्दिर परिसरमा जम्मा भई भगवान् शिवको पूजा–अर्चना, जलाभिषेक तथा भजन–कीर्तनमा तल्लीन देखिएका छन्।

आज बिहान ४ बजेबाटै हजारौं श्रद्धालुहरू मन्दिरमा उपस्थित भएका थिए। भक्तजनहरू विशेष रूपमा बेलपत्र, धतुरो, अक्षता, दूध र गंगाजल चढाउँदै भगवान् शिवको कृपा प्राप्त गर्न आएका थिए। पूजाको क्रममा ओम नमः शिवायको घन्कोले मन्दिर परिसर भक्तिमय बनेको छ ।

यस अवसरमा विभिन्न धार्मिक तथा सांस्कृतिक कार्यक्रमहरू पनि आयोजना गरिएको छ। स्थानीय भक्तजनहरूका साथै टाढा–टाढाबाट आएका श्रद्धालुहरूले तौलेश्वर महादेवको दर्शन गर्दै महाशिवरात्रिको विशेष पुण्य प्राप्त गरेका छन्।

यसरी नै, दिनभर मन्दिरमा भक्तजनहरूको आगमन निरन्तर भइरहेको छ। मेला जस्तै माहोल सृजना भएको मन्दिर परिसरमा शिवजीका जयकारा गुञ्जिरहेका छन्। स्थानीय प्रशासन र स्वयंसेवक टोलीले भक्तजनहरूको व्यवस्थापनमा सहयोग गरिरहेका छन्।

महाशिवरात्रि पर्वले धार्मिक एकता तथा श्रद्धाको भावना बलियो बनाउँदै हिन्दू धर्मावलम्बीहरूलाई आध्यात्मिक सुख प्रदान गर्ने विश्वास गरिएको छ।

हेर्नुहाेस तस्बिरहरू :