राहदानी बनाउन जाँदै हुनुहुन्छ ? पर्खनुहोस्, पछिल्लो चारदिन देखि ठप्प छ सेवा !

साझाकुरा,कपिलवस्तु, मंसिर १० | पछिल्लो एक हप्ता देखि राहदानी बनाउन जिल्ला प्रशासन कार्यालयमा पुग्ने सेवाग्राहीहरु निराश भएर फर्किन बध्य छन् । कपिलवस्तुसहित देशभर राहदानी फाँटमा यस्तो समस्या भइरहेको हो ।

राहदानी फाँटमा केन्द्रबाट सिस्टमले काम नगरेको जिल्ला प्रशासन स्थित राहदानी फाँटका कर्मचारी बताउँछन् । कपिलवस्तु स्थित जिल्ला प्रशासन कार्यालयले मंसिर ६ गते एक सूचना वेवसाइटमा प्रकाशन गरी सिस्टमको समस्याका कारण राहदानी सम्बन्धी काम हुन नसकेको सेवाग्राहीमा जानकारी गराएको थियो । प्रशासनले चार दिन अघि यसबारे सूचना निकाल्दा पनि केन्द्रबाटै देखिएको यो समस्यामा केन्द्रिय राहदानी विभाग गम्भिर बन्न नसक्दा देशभर राहदानी बनाउन प्रशासनमा पुग्ने सेवाग्राही निराश हुने गरेका छन् ।

कतिपय जिल्लामा भने नागरिकले समयै सूचना नपाउँदा जिल्ला प्रशासन कार्यालयसम्म पुग्नु परेको गुनासो पनि बढ्दो छ । राहदानीको ‘अनलाइन इनरोलमेन्ट’ का क्रममा भाइरस सल्केपछि सेवा अवरुद्ध हुन पुगेको हो ।राहदानी विभाग र त्यस अन्तर्गत राहदानी सेवा सञ्चालन हुने जिल्ला प्रशासन, इलाका प्रशासन, विदेशस्थित कूटनीतिक नियोगसमेतको सेवा ठप्प रहेकाले सेवाग्राही मर्कामा परेका छन् । केन्द्रीय विभागबाटै भएको सर्भर डाउनको समस्या कपिलवस्तुमा पनि आइतबार सम्म कायमै रहेको थियो । सोमबार पनि यो समस्या कायमै रहने अनुमान गरिएको छ । यसबाट नयाँ राहदानी बनाउने, पुरानो राहदानी नवीकरण गर्नेलगायत राहदानीसम्बन्धी सबै कार्य अवरुद्ध रहेको जनाइएको छ ।

राहदानीका लागि अनलाइन फारम फरेर फोटो खिचाउन र विद्युतीय हस्ताक्षर गरेर पेश गर्न सेवाग्राही प्रशासन कार्यालय पुग्छन् । विभागकै कारण कपिलवस्तुमा पनि राहदानी वितरणदेखि फोटो खिचाउनेसम्मका सबै काम ठप्प भएका छन् ।

विभागले १० गतेभित्र सबै समस्या समाधान गर्ने बताएकाले छिटै समस्या हल हुने बताइएको छ ।