रुपन्देहीमा मिटरव्याज सम्बन्धी ९३ उजुरी फछ्र्याैट

बुटवल । जिल्ला प्रशासन कार्यालय रुपन्देहीमा मिटरव्याज सम्बन्धी ९३ वटा उजुरी पछ्र्यौट भएका जनाइएको छ । सरकारले देशभरबाट मिटरव्याज पिडितका उजुरी दर्ता गर्ने अभियान चालएसँगै रुपन्देहीमा दर्ता भएका ५ सय बढी उजुरी उपर गरिएको छलफलका क्रममा अहिले सम्म ९३ उजुरी पछ्र्याैट भएको हो ।

रुपन्देहीमा कुल ५३६ उजुरी परेका मध्ये हालसम्म १८३ वटा उजुरीउपर छलफल भएको र छलफल गराइएका मध्ये ९३ वटा उजुरी फछ्र्यौट भएको जिल्ला प्रशासन कार्यालयका नासु बालकृष्ण आचार्यले बताए ।

प्रमुख जिल्ला अधिकारी भरतमणि पाण्डेका अनुसार जिल्ला प्रशासन कार्यालयका प्रवक्ता रामचन्द्र अर्यालको नेतृत्वमा प्रशासन कार्यालयमा दिनहुं जसो दुवै पक्षका बीचमा छलफल भइरहेको छ ।

जिल्ला प्रशासनमा दर्ता भएका उजुरीहरुमा दुई लाखदेखि करोडौं रकमसम्मका लेनदेन र कारोबारका विषयहरु रहेको बताइएको छ । ती सबै उजुरीमा दुवै पक्ष र जिल्लास्तरीय कार्यदलका बीच छलफल हुंदै आएको छ ।

वैदेशिक रोजगारीमा जान लाग्ने खर्च व्यवस्थापन गर्न, बिरामी हुंदा उपचार गर्न, छोराछोरीको विवाह, व्रतबन्ध, किरिया खर्च, चाडवाड खर्च लगायतमा रकम लगेर नदिएको उजुरी छन् ।