प्रदेश प्रमूख शेरचनले भने, ‘संविधान रक्षाका लागि दलहरूको एकता र समझादारी आवश्यक छ’

दाङ । लुम्बिनी प्रदेश प्रमुख अमिक शेरचनले अग्रगामी विचार राख्ने दलहरूबीचको बलियो एकता र सहकार्यले मात्र समाजवादको सपना पूरा हुने बताएका छ। सोह्रौँ गणतन्त्र दिवसका अवसरमा शुभकामना सन्देश जारी गर्दै उनले यस्तो बताएका हुन्।

गणतन्त्र को मुख्य उद्देश्य र लक्ष्य पनि समाजवाद रहेकाले लक्ष्य हासिल गराउनेतर्फ लाग्नुपर्ने उनको भनाइ छ। समुन्नत राष्ट्र निर्माण र जनताको समृद्धि प्राप्त गर्न १९ दिने महान् जनसंघर्षमा सहभागी दलहरूको एकता एवम् समझादारीले मात्र संविधानको रक्षा र संविधानलाई अपनत्व नलिने तत्त्वहरूका विरुद्ध बलियो स्तम्भ बन्न सक्ने उनले जनाएका छन्।

‘त्यसले मात्र राष्ट्रिय औद्योगिक विकासलाई विस्तार गर्दै आत्मनिर्भर अर्थतन्त्रमा फड्को मार्न सकिने छ,’ सन्देशमा उल्लेख छ, ‘समाजवादी व्यवस्था स्थापनाका लागि मार्गप्रशस्त हुने छ, सहिदहरूको बलिदान सार्थक हुने छ।’

नेपाली जनताले प्राप्त गरेको यो सीमित गणतन्त्र दिवसले वंश परम्परामा आधारित निरंकुश सामन्ती राजतन्त्रात्मक शासनलाई अन्त्य गरेको दिन भएकाले यो आफैंमा दीर्घ ऐतिहासिक रहेको उनले उल्लेख गरेका छन्।

‘म के स्पष्ट गराउन चाहन्छु भने प्रतिगमनविरुद्धको संघर्षका बेला तत्कालीन राजतन्त्रसँग सझौता गरेको भन्ने हल्ला विल्कुलै कपोलकल्पित र निराधार हुन,’ सन्देशमा उल्लेख छ, ‘प्रतिगमनविरुद्ध संघर्षरत तत्कालीन सात दलका नेताहरूले हस्ताक्षर गरेको सझौता पत्र सार्वजनिक गर्न ती तत्त्वहरूलाई चुनौती दिन चाहन्छु।’