विजयनगरका आगलागी पीडितलाई खाद्यान्न र लत्ताकपडा वितरण

कपिलवस्तु । कपिलवस्तुको विजयनगर गाउँपालिका–५, सिसवाका आगलागी पीडितलाई खाद्यान्न र लत्ताकपडा वितरण गरिएको छ । गएको बिहीबार उक्त स्थानमा आगलागी हुँदा ७ घर, ११ गोठ र ५ भान्सा जलेर नष्ट भएको थियो । २ वटा पक्की घरमा क्षति पु¥याएको थियो ।

जिल्ला प्रशासन कार्यालयले समन्वय गरेर रेडक्रस सोसाइटी शाखा र विजयनगर गाउँपालिकाले तत्कालै राहत प्रदान गरेका हुन् । रेडक्रसले आगलागि पीडित २५ परिवारका लागि त्रिपाल एकएक थान, ब्लयांककेट दुई थान, कपडा र भाँडाकुँडा सेट एक÷एक थान वितरण गरेको प्रमुख जिल्ला अधिकारी शंकरहरि आचार्यले बताउनुभयो ।

त्यस्तै, विजयनगर गाउँपालिकाले बढी क्षति भएका ९ घरमा ५ हजार बराबरको खाद्य सामग्री प्रदान गरेको छ । यसले उनीहरुलाई साँझ बिहानको छाक टार्न सहज भएको वडा अध्यक्ष अनवर मुसलमानले बताउनुभयो । स्थानीय कुसुम पासीको घरबाट सुरु भएको आगलागीबाट एक करोडभन्दा बढीको क्षति भएको थियो ।

शिवराज र कृष्णनगर नगरपालिका, प्रहरी, सशस्त्र प्रहरी र स्थानीयको सहयोगमा उक्त स्थानमा लागेको आगो करिब तीन घन्टापछि नियन्त्रण आएको थियो ।