६ वर्षे कार्यकाल पूरा गरी बिदा भए आयुक्त ईश्वरी पौड्याल

काठमाडौँ ।  ६ वर्षे कार्यकाल पूरा गरी निर्वाचन आयोगको आयुक्तबाट ईश्वरी पौड्याल बिदा भएका छन् ।

बिहीबार आयोगका प्रमुख निर्वाचन आयुक्त दिनेशकुमार थपलिया, अन्य आयुक्तहरू, सचिव र कर्मचारीहरूको उपस्थितिमा विशेष कार्यक्रम गरी आयुक्त पौड्याललाई बिदाई गरिएको हो ।

प्रमुख आयुक्त थपलियाले संविधान र कानूनको पालना गर्दै मुलुक र जनताको हितमा निष्ठापूर्वक सेवा गर्ने अग्रजका रूपमा आफूले आयुक्त पौड्याललाई पाएको उल्लेख गर्दै आयोगको छविलाई उच्च राख्न खेलेको भूमिकाको प्रशंसा गरे ।

उनको ६ वर्षे कार्यकालमा २०७४ र २०७९ को प्रतिनिधिसभा तथा प्रदेशसभा सदस्यको दुईवटा निर्वाचन भएको छ । आयोगका कर्मचारीहरू पौड्याललाई परिपक्व निर्णय गर्ने क्षमता भएको आयुक्त रहेको बताउँछन् ।

गत ४ मंसिरमा भएको निर्वाचनमा बाजुरा र स्याङ्जामा पुनःनिर्वाचन गराउन नहुने भन्दै फरक मक मत राखेका थिए ।

त्यसैगरी, पौड्यालले राष्ट्रपति तथा उपराष्ट्रपतिको निर्वाचनको मितिमा पनि फरक मत राखेका थिए । यद्यपि उनी राष्ट्रपति तथा उपराष्ट्रपतिको निर्वाचन अगावै बिदा भएका छन् । अब आयोगमा एक आयुक्त रिक्त भएको छ ।

संवैधानिक परिषद्को सिफारिसमा राष्ट्रपतिले आयोगको आयुक्त नियुक्त गर्ने प्रावधान छ ।