भूमिगत संगठनको नाममा धम्काउदै चन्दा उठाउने पक्राउ

कपिलवस्तु

जिल्ला प्रहरी कार्यालय कपिलवस्तुले भूमिगत संगठनको नाममा धम्काउदै चन्दा उठाउने ४ जना पक्राउ गरेको छ। प्रहरीले नेपाल जनतान्त्रिक मुक्ति मोर्चाका संयोजक विकरान्त भन्ने जग्गु तेली, कपिलवस्तु जिल्ला इन्चार्ज विपिन विक, बृजेश गिरी र सुग्रिम रैदासलाई पक्राउ गरेको हो।
गत कात्तिकमा २ वटा ट्रक र एउटा मोटरसाइकल जलाएको तथा विभिन्न व्यक्तिसँग धम्कीपूर्ण रुपमा चन्दा उठाएको आरोपमा उनीहरुलाई पक्राउ गरिएको प्रहरीले जनाएको छ ।

ती गाडी जलाएका घटनास्थलमा नेपाल जनतान्त्रिक मुक्ति मोर्चाको संयोजक विकरान्तबाट जारी गरेको निर्वाचन बहिष्कार, नेपाल बन्द लगायतका विभिन्न ७ बुदे मागसहितको पर्चाहरु प्रहरीले फेला पारेको थियो ।

त्यस्तै उनीहरुले कृष्णनगर नगरपालिका-९ बहादुरगञ्जका ३४ वर्षका वुद्धकुमार अग्रहरि सँग २५ लाख, कृष्णनगर नगरपालिका-८ मौजा गणेशपुरका ४४ वर्षका ओमकार चौधरी सँग १० लाख, शिवराज नगरपालिका-७ बालानगर बस्ने पुजारीप्रसाद चौधरी सँग ५ लाख रुपैयाँ चन्दा मागेका थिए । चन्दा नदिए भौतिक आक्रमण गर्ने चेतावनी दिएका थिए ।

मागेको चन्दामध्ये १ लाख लिँदै गर्दा १३ माघमा बिरु भन्ने बृजेश गिरी र सुग्रिम रैदास १ लाख रुपैयाँसहित पक्राउ परेका थिए । उनीहरुको सूचनाको आधारमा प्रहरीले बिकरान्त भन्ने जग्गु तेली र जनतान्त्रिक मुक्ति मोर्चाका जिल्ला इन्चार्ज बताउने विपिन विक पनि पक्राउ परेका हुन् ।