योग दिवस : कपिलवस्तुमा महिलाहरूको अगुवाइमा गरियो वैदिक यज्ञ योग

कपिलवस्तु । आठौं अन्तर्राष्ट्रिय योग दिवसका अवसरमा कपिलवस्तुको तौलिहवास्थित राधाकृष्ण मन्दिरमा महिलाहरुको अगुवाइमा मंगलबार बिहान वैदिक यज्ञ योग (हवन) सम्पन्न गरिएको छ । एक दर्जन महिलाहरुले राधा कृष्णमा यज्ञ कुन्ड बनाई वैदिक विधि अनुसार हवन गरेका हुन्।

विदुषी पार्वती शर्माको अगुवाइमा हवन गरिएको हो। हवनमा गायत्री गुप्ता, सरस्वती पौडेल सरिता निसाद माया पाण्डेय, नर्मदा ज्ञवाली, मधु आचार्य, कल्पना रेग्मीलगायतका महिलाहरु यज्ञमा कर्ताहरुमा सहभागी थिए। यज्ञ बिहान एक घन्टासम्म चलेको थियो।

महिलाहरु कै अगुवाइमा जिल्ला मै पहिलोपटक यज्ञ गरिएको विदुषी पार्वती शर्माले बताइन्। ‘यज्ञ महिलाहरुले पनि गर्न सक्छन् यो हामीले गरे देखाएका छौ,’ उनले भनिन्। महिला अधिकारका कुरा उठिरहेको बेला यसरी महिला कै अगुवाइ गरिएको यो यज्ञले समाज राम्रो सन्देश जाने उनले बताइन्। ‘महिलाहरुलाई अवसर दिइए हामीले पुरुष सरह काम गर्न सक्छौ,’ उनले भनिन्।

पत्रकार महासंघ कपिलवस्तुका पूर्व अध्यक्ष तथा योग प्रशिक्षक नारायण पौडेलले महिलाहरु कर्ता भई गरिएको यो यज्ञ आफैमा प्रशंसनी कार्य रहेको बताए। उनले यो कार्यले महिलाहरुको हौसाल बढ्ने र उनीहरुलाई प्रेरणा मिल्ने बताए। कपिलवस्तु आयुर्वेद स्वास्थ्य केन्द्र र पताञ्जली योग समिति तौलिहवाको संयुक्त आयोजनामा महिलाहरुको अगुवाइमा वैदिक यज्ञ, योग शिविर र स्वास्थ्य परीक्षण सम्पन्न गरिएको हो।

योग शिविरमा महिला र पुरुष गरी ४० बढीको सहभागिता थियो। शिविरमा एक घन्टासम्म योग प्रशिक्षक पौडेलले योग अभ्यास गराएका थिए। यस्तै शिविरमा ४० बढीको सुगर र प्रेसरको जाँच गरिएको थियो। स्वास्थ्य केन्द्रका चिकित्सक आषिश चौधरी, बरिष्ठ कबिराज निरीक्षक हरिालाल पाध्या, ल्याब टेक्निसियन रिता श्रेष्ठ अन्जु श्रीवास्तव, केदार खनाल लगायतको टोलीले स्वास्थ्य जाँच गरेका थिए।

दिवसका अवसरमा प्रसाद समेत वितरण गरिएको थियो। दिवस कै अवसरमा सोमबार प्रहरीहरुको सहभागितामा योग शिविर समेत सम्पन्न गरिएको थियो।