कपिलवस्तुमा असोज महिनामा ४४ अपराधका घटना दर्ता

कपिलवस्तु

प्रहरी कारबाहीबाट ३ करोड राजस्व संकलन

कपिलवस्तुमा असोज महिनामा जिल्ला प्रहरी कार्यालय र मातहतका प्रहरी कार्यालयमा ४४ वटा अपराधका घटना दर्ता भएका छन् । २१ वटा मुद्दाका आरोपीलाई पक्राउ गरेर प्रहरीले अनुसन्धान पुरा गरेको छ । २३ वटा मुद्दा अनुसन्धानको प्रक्रियामा रहेको जिल्ला प्रहरी कार्यालय कपिलवस्तुका प्रवक्ता (डिएसपी) धर्मराज भण्डारीले बताएका छन् ।

असोजमा कपिलवस्तु प्रहरीले पेन्डिङमा रहेका पुराना ३९ वटा मुद्दा फर्स्योट गरेको छ । प्रहरीको सक्रियताका कारण कपिलवस्तुमा असोजमा ३ करोड १ लाख राजस्व संकलन गरिएको छ । प्रहरीले भदौ महिनामा ८० लाख राजस्व संकलन गरेको थियो । चोरी तस्करी नियन्त्रण गर्न कार्ययोजना बनाएर कपिलवस्तु प्रहरीले अपरेशन सञ्चालन गरेको बताइएको छ । गत वर्ष असोजमा कपिलवस्तु प्रहरीले ६६ लाख ६८ हजार राजस्व संकलन गरेका थियो ।

असोजमा ४८ जना फरार प्रतिवादीलाई प्रहरीले पक्राउ गरेको छ । तीमध्ये २० वर्षदेखि फरार रहेका ३ जनालाई पक्राउ गरिएको छ ।

प्रहरीका अनुसार लागुऔषध खैरो हेरोइन कारोबार गर्ने ३ जनालाई असोज महिनामा पक्राउ गरेको थियो । ईलाका प्रहरी कार्यालय पिपराको टोलीले असोज ६ मा झापा घर भएका सलिम थापामगर र मोरङ घर भएका विनोद लामालाई १३ दशमलव ९३ ग्राम खैरो हेरोइनसहित पक्राउ गरेको जनाएको छ ।

ईलाका प्रहरी कार्यालय पकडीका इन्सपेक्टर कृष्णबहादुर खत्री नेतृत्वको टोलीले असोज २२ मा शुद्धोधन गाउँपालिका घर भएका नियाज महमद मुसलमानलाई ११ दशमलव ५ सय ग्राम खैरो हेरोइनसहित पक्राउ गरेको थियो । असोज महिनामा कपिलवस्तु प्रहरीले अपराधमा संलग्न ३९ जना आरोपीलाई पक्राउ गरेको थियो । ८ जना फरार भएको र उनीहरुको खोजी भइरहेको डिएसपी भण्डारीले बताए ।