लुम्बिनीका ९ जिल्लामा मात्रै सुरु भयो कांग्रेसको गाउँ–नगर अधिवेशन

कपिलवस्तु ।
लुम्बिनी प्रदेशका १२ जिल्ला मध्ये शनिबार नेपाली कांग्रेसको १४ औँ महाधिवेशन अन्र्तगत ९ जिल्लामा मात्रै गाउँनगर अधिवेशन सुरु भएको छ ।

१२ जिल्ला रहेको लुम्बिनी प्रदेशका ३ जिल्लामा भने निर्धारित तालिका अनुसार निर्वाचन हुन सकेको छैन । प्रदेशका बाँके र गुल्मीमा भने विवादका कारण रोकिएको छ । कपिलवस्तुमा विवादका कारण रोकिएका वडा अधिवेशन नभएकाले शनिबार पालिका अधिवेशन हुन सकेको छैन । वडाको अधिवेशनमा आकांक्षिहरु बढी भएपछि कांग्रेसलाई निर्वाचन सम्पन्न गर्न हम्मेहम्मे परिरहेको छ । कपिलवस्तुमा शनिबार सम्म वडाको अधिवेशन सक्ने र असोज १२ गते गाउँनगरको अधिवेशन गर्ने तयारी गरिएको छ । अन्य ९ वटा जिल्लामा भने बिहान ८ बजेदेखि निर्वाचनको कार्यक्रम सुरु भएको छ ।

बर्दियाको विवाद भने केही दिनअघि हल गरिएको थियो । बाँकेमा क्रियाशील र गुल्मीमा आन्तरिक विवादले गाउँ–नगरको अधिवेशन रोकिएको कांग्रेस नेता अमर पुनले जानकारी दिनुभएको छ ।

पुनका अनुसार बाँकी जिल्लामा शनिबार बिहानैबाट गाउँ–नगरको अधिवेशन सुरु भएको छ । नेपाली कांग्रेसको गाउँ–नगर अधिवेशनका लागि गुटगत दुई प्यानल चुनावी मैदानमा छन् । लुम्बिनीका अधिकांश गाउँ–नगरमा पार्टी सभापति शेरबहादुर देउवा र वरिष्ठ नेता रामचन्द्र पौडेल समूहको प्यानल घोषणा भएको हो । दुवै समूहका प्रभावशाली नेताहरु आफ्नो समूहका नेताहरुलाई पालिकामा जिताउन मैदानमा पुगेका छन् ।