निर्वाचन आयोगले निर्वाचनका लागि तयारी थाल्यो

निर्वाचन आयोगले निर्वाचनका लागि तयारी थालेको छ । सरकारले प्रतिनिधिसभा विघटन गर्दै निर्वाचनको मिति घोषणा गरेपछि आयोगले तयारी थालेको हो । तर, यो मुद्दा सर्वोच्च अदालतमा विचाराधीन छ

आयोगले मतदाता नामावली अद्यावधिकको काम थाल्ने भएको छ । यस्तै आयोगले जिल्ला निर्वाचन अधिकृतहरुलाई एक दिने प्रशिक्षण पनि दिएको छ । मतदाता नामावली अद्यावधिक र मतदान स्थल तथा मतदान केन्द्र पुनरावलोकन कार्यक्रम कार्यान्वयनसम्बन्धी जिल्ला निर्वाचन अधिकृतहरुलाई एकदिने प्रशिक्षण दिएको हो । पुष २६ र २७ गते २ समूहमा भर्चुअलबाट प्रशिक्षण दिइएको आयोगद्वारा विज्ञप्ती मार्फत जानकारी दिइएको छ ।

प्रशिक्षण कार्यक्रममा प्रमुख निर्वाचन आयुक्त दिनेशकुमार थपलियाले स्वच्छ, स्वतन्त्र, निष्पक्ष, विश्वसनीय र मितव्ययी रूपले निर्वाचन सम्पन्न गर्न मतदाताको पहुँचयोग्य हुने गरी मतदान स्थलको पुनरावलोकन र त्रुटिरहित मतदाता नामावली प्रकाशन गर्ने कार्य तोकिएकै समयमा सम्पन्न गर्नुपर्ने बताउनुभयो