बेलायत प्रवेशका गर्न अब कोरोना नेगेटिभ रिपोर्ट अनिवार्य

एजेन्सी ।

अरु देशबाट बेलायत पुग्नेले कोरोना भाइरस ९कोभिड(१९०को नेगेटिभ रिपोर्ट लिएरमात्रै प्रवेश पाउने भएका छन् ।

बेलायती प्रधानमन्त्री बोरिस जोनसनले अरु देशबाट बेलायत पुग्ने सबै यात्रुलाई कोरोनाको नेगेटिभ रिपोर्ट अनिवार्य भएको बताएका हुन् । उनले यसबारेमा विस्तृत जानकारी छिट्टै दिने बताएका छन् ।

बेलायतमा कोरोना भाइरसको नयाँ प्रकार तीब्रगतिमा फैलन थालेपछि सरकारले कडाई गर्दै मंगलबारदेखि फेब्रुअरी मध्यसम्मको लागि लकडाउनको घोषणा गरेको छ । लकडाउनसँगै उसले त्यहाँ प्रवेशका लागि थप कडाई गरेको हो ।

लकडाउन लागु भएसँगै मंगलबारदेखि कोही पनि घरबाहिर निस्कन पाएका छैनन् । संक्रमित र अस्पताल भर्ना हुनेको संख्या बढिरहेको छ ।

यस्तै प्रधानमन्त्री जोनसोनले अर्को महिनाको मध्यदेखि संवेदनशील शीर्ष चार समूहलाई कोरोना विरुद्धको खोप दिन सुरु गर्ने बताए । उनका अनुसार हेरचाह केन्द्रमा रहेका व्यक्ति, ७० वर्ष नाघेका वृद्धवृद्धा, सामाजिक र स्वास्थ्य क्षेत्रमा अग्रस्थानमा रहेर कार्यरत कर्मचारी र जोखिमयुक्त मानिएका व्यक्तिलाई खोपको पहिलो डोज दिइनेछ।​

डाउनस्ट्रिटमा बोल्दै प्रधानमन्त्री जोनसनले बुधबार सबेरै कानुनको रुपमा लागु हुनु अघि नै लकडाउन पालना गर्न पनि सबैसँग अनुरोध गरेका हुन् ।

बेलायतका चीफ मेडिकल अफिसर क्रिस विट्टीका अनुसार इङल्याण्डमा मात्रै ५० मध्ये एक जनामा कोरोना संक्रमण छ । उनले सन् २०२० को अन्तिम दुई हप्तामा बेलायतमा संक्रमितको संख्या ७० प्रतिशतले बढेको जानकारी पनि दिए ।

कोरोना भाइरसको नयाँ प्रकार बेलायतको सबै हिस्सामा फैलिरहेको भन्दै सचेत हुन पनि उनले सबैसँग आग्रह गरेका छन् । बेलायतमा अहिलेसम्म २७ लाख ७४ हजारमा कोरोना भाइरसको संक्रमण पुष्टि भइसकेको छ ।

जसमध्ये ७६ हजारको मृत्यु भएको छ । त्यहाँ गएको २४ घण्टामा मात्रै ६० हजार बढी संक्रमित थपिँदा ८ सयको मृत्यु भएको छ ।