फागुन २१ को निर्वाचन तयारी: कपिलवस्तुमा ५२ प्रकारका सामग्रीसहित २९ सय ४६ कर्मचारी परिचालन हुँदै

कपिलवस्तु । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै कपिलवस्तु जिल्लामा आवश्यक तयारी तीव्र पारिएको छ । जिल्ला निर्वाचन कार्यालयले ५२ प्रकारका निर्वाचन सामग्रीसहित २९ सय ४६ जना कर्मचारी मतदान केन्द्रमा खटाउने तयारी गरेको जनाएको छ ।

जिल्ला निर्वाचन कार्यालयका सूचना अधिकृत निश्चल मोक्तानका अनुसार जिल्लाभर रहेका ४९१ मतदान केन्द्रका लागि ४९१ वटा ‘पोका’ तयार पारिएको छ । प्रत्येक मतदान केन्द्रका लागि छुट्टाछुट्टै पोका बनाएर सामग्री व्यवस्थित रूपमा प्याकिङ गरी पठाउने अन्तिम तयारी भइरहेको उनले जानकारी दिए ।

निर्वाचन प्रयोजनका लागि आवश्यक ५२ प्रकारका सामग्रीमध्ये ३७ प्रकारका सामग्री निर्वाचन आयोगबाट उपलब्ध गराइएको छ भने १५ प्रकारका सामग्री जिल्ला निर्वाचन कार्यालयले आफैं व्यवस्था गरेको हो । ती सामग्रीमा मतपत्र, मतपेटिका, स्वस्तिक छाप, मतदाता नामावली, मतदान अधिकृतका कागजात, फाराम, सिलबन्दी सामग्री, स्ट्याम्प प्याड, इन्डेलिबल मसी, डोरी, ट्याग लगायतका अत्यावश्यक सामग्री समावेश छन् ।

जिल्लामा खटिने २९ सय ४६ कर्मचारीमा मतदान अधिकृत, सहायक मतदान अधिकृत, सहायक कर्मचारी तथा कार्यालय सहयोगी समावेश रहेका छन् । प्रत्येक मतदान केन्द्रमा न्यूनतम आवश्यक जनशक्ति सुनिश्चित गरिएको छ । मतदान अधिकृत र सहायक मतदान अधिकृतहरूको टुंगो लागिसकेको छ भने अन्य कर्मचारीको जिम्मेवारी पनि निर्धारण भइसकेको जनाइएको छ ।

निर्वाचन सामग्रीको सुरक्षित ढुवानी र भण्डारणका लागि सुरक्षा निकायसँग समन्वय गरी विशेष योजना बनाइएको छ । सामग्री सम्बन्धित मतदान केन्द्रसम्म सुरक्षित रूपमा पु¥याउन नेपाल प्रहरी, सशस्त्र प्रहरी बल तथा आवश्यकताअनुसार नेपाली सेनाको सहयोग लिइने जनाइएको छ ।

जिल्ला निर्वाचन कार्यालयका अनुसार मतदान केन्द्रहरूमा आवश्यक भौतिक पूर्वाधारको अवस्थाबारे पनि अनुगमन गरिएको छ । पहुँचमार्ग, सञ्चार सुविधा, सुरक्षा संवेदनशीलता तथा व्यवस्थापनका पक्षहरूलाई मध्यनजर गर्दै तयारीलाई अन्तिम रूप दिइँदैछ ।

कपिलवस्तुमा तीन निर्वाचन क्षेत्र रहेका छन् । यसपटक जिल्लाबाट प्रतिनिधिसभामा तीन जना सांसद प्रत्यक्ष निर्वाचित हुनेछन् । जिल्लाभर ९८ जना उम्मेदवार चुनावी मैदानमा छन् ।

निर्वाचन नजिकिँदै जाँदा प्रशासन, सुरक्षा निकाय र निर्वाचन कार्यालयबीच समन्वय थप सुदृढ बनाइएको छ । आवश्यक सामग्री, जनशक्ति र सुरक्षा व्यवस्थापन पूरा भएसँगै फागुन २१ को निर्वाचन शान्तिपूर्ण र व्यवस्थित रूपमा सम्पन्न हुने अपेक्षा गरिएको छ ।