रविलाई ल्याइयाे भैरहवा, सोमबार कारागार पठाइने

काठमाडौं । सहकारी ठगी प्रकरणमा काठमाडौंबाट पक्राउ परेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई भैरहवा पुर्याइएको छ ।

लामिछानेलाई यति एयरलाइन्सको जहाजबाट शनिबार बिहान ९.१२ बजे गौतमबुद्ध विमानस्थलमा पुर्‍याइएको छ।

उनलाई जिल्ला प्रहरी कार्यालयको हिरासतमा राखिएको छ ।

शुक्रबार साँझ बूढानीलकण्ठस्थित हेपाली हाइटस्थित निवासबाट उनलाई पक्राउ गरिएको थियो । पक्राउ परेका लामिछानेलाई शुक्रबार राती भद्रकालीस्थित जिल्ला प्रहरी परिसर काठमाडौंको हिरासतमा राखिएको थियो ।

जिल्ला प्रहरी कार्यालय रुपन्देहीका एसपी रञ्जित सिंह राठौरका अनुसार लामिछानेलाई आइतबार सार्वजनिक विदा भएकाले सोमबार अदालत खुलेपछि कारागार पठाइने छ ।

संगठित रुपमा सहकारी ठगी गरेको आरोप खेपिरहेका रास्वपा सभापति लामिछानेलाई शुक्रबार उच्च अदालत तुलसीपुरको बुटवल इजलासले सुप्रिम बचत तथा सहकारीको रकम ठगेको कसुरमा पुर्पक्षका लागि थुनामा पठाउन आदेश दिएको थियो ।

न्यायाधीशद्वय रमेश ढकाल र स्वीकृति पराजुलीले सो आदेश गरेका हुन् ।

यसअघि बुटवलको सुप्रिम सहकारी प्रकरणमा रुपन्देही जिल्ला अदालतले एक करोड धरौटी रकम मागेको आदेशमा चित्त नबुझाएर लामिछानेले उच्च अदालतमा निवेदन दिएका थिए । बुटवलको सुप्रिम सहकारी प्रकरणमा जिल्ला अदालत रुपन्देहीले उनलाई एक करोड धरौटी माग गरेको थियो ।

उक्त आदेश उल्ट्याउँदै उच्चले थुनामा पठाउने आदेश गरेको हो । आदेशको सूचना समेत नदिई पक्राउ गरिएको र पक्राउ पूर्जी नदिइएको भन्दै रास्वपा नेता कार्यकर्ताले आलोचना गरेका छन् ।