प्यूठानमा एक वृद्धको हत्या, वनको भित्री बाटोमा शव फेला !

प्युठान | प्यूठानमा एक ६८ वर्षीय पुरूषको हत्या भएको छ । प्यूठानको गौमुखी गाउँपालिका–५ का ६८ वर्षीय चिन्तामणि उपाध्यायको हत्या भएको जिल्ला प्रहरी प्रमुख डिएसपी दिपेश बस्यालले जानकारी दिए ।

उपाध्यायको अनुहारमा गहिरो घाउ खत देखिएको हुँदा उनीमाथि घरेलु हतियार प्रहार भएको हुन सक्ने डिएसपी बस्यालले बताएका छन् । उपाध्यायको शव शुक्रबार बिहान ९ बजेतिर खुमबाट नारीकोट जाने कवलपति वनको भित्री बाटोमा शव फेला परेको थियो ।

उपाध्याय सामान्य खेती किसानी गर्ने व्यक्ति थिए । उपाध्यायको हत्या आशंकामा प्रहरीले तीन–चार जनालाई नियन्त्रणमा लिएको जनाइएको छ । ‘हामी हत्यामा संलग्न व्यक्तिको नजिक पुगेका छौं, आरोपी उम्कन सक्ने अवस्था छैन’, ’ डिएसपी बस्यालले भने । घटनास्थल जिल्ला प्रहरी कार्यालय खलंगाबाट ४६ किलोमिटर टाढा पर्छ ।