रास्वपा लुम्बिनी प्रदेशको निष्कर्ष : केन्द्रले आन्दोलन चर्काउन सकेन

काठमाडौं । राष्ट्रिय स्वतन्त्र पार्टी लुम्बिनी प्रदेशले आन्दोलनका लागि पार्टी केन्द्र चुकेको निष्कर्ष निकालेको छ ।

लुम्बिनी प्रदेशको २२ र २३ गते बसेको बैठकका निर्णय अनुसार प्रदेश सभापति देवराज पाठकले शनिबार केन्द्रीय आन्दोलन परिचालन समितिका संयोजक डीपी अर्याललाई पत्र पठाएका थिए । हालसम्मको आन्दोलनको ठोस योजना बनाएर मूर्तरुप दिन केन्द्रीय समिति चुकेको पत्रमा लेखिएको छ ।

आन्दोलनको स्पष्ट खाका तुरुन्त बनाएर पार्टीको वडा तहसम्मका समितिलाई परिचालन गर्न प्रदेश समितिले सुझाव दिएको छ । सडक आन्दोलनका लागि अन्य पार्टीसँग समेत सहकार्य गर्नुपर्ने सुझाव दिइएको छ ।

पत्रमा नयाँ जनमत पार्टी सहित नयाँ वैकल्पिक शक्तिसँग पार्टी एकता गर्न संवाद समिति बनाउनुपर्ने सुझाव दिइएको छ । २ कात्तिकमा सभापति रवि लामिछाने सहकारी ठगीमा प्रक्राउ परेपछि रास्वपाले निरन्तर सडक प्रदर्शन गर्दै आएको छ ।