एनपीएल : पूर्व भारतीय यू–१९ कप्तान चन्द लुम्बिनी लायन्समा अनुबन्ध

बुटवल : भारतीय यू–१९ विश्वकप विजेता कप्तान तथा आईपीएल स्टार उन्मुक्त चन्द नेपाल प्रिमियर लिग (एनपीएल) का लागि लुम्बिनी लायन्समा अनुबन्धित हुनुभएको छ ।

चन्दको आगमनले लुम्बिनी लायन्सलाई उल्लेखनीय रूपमा बलियो बनाउने विश्वास गरिएको छ । उन्मुक्त चन्दले भारतलाई कप्तानको रुपमा २०१२ यू–१९ विश्वकप जिताउनुभएको थियो । 

फाइनल खेलमा उहाँले शतक समेत हान्नुभएको थियो । उहाँले आइपिएलमा दिल्ली डेयरडेभिल्स र मुम्बई इन्डियन्स जस्ता ठूला फ्रेन्चाइज टोलीबाट खेल्नुभएको छ । 

हाल अमेरिकाको मेजर लिग क्रिकेटमा उत्कृष्ट प्रदर्शन गरिरहनुभएका चन्दको आगमनले टोलीलाई बलियो बनाउने लुम्बिनी लायन्सले विश्वास गरेको छ । चन्दले ६७ फस्ट क्लास खेलमा तीन हजार ३७९ रन बनाउनुभएको छ । जसमा उहाँको औसत रन ३१.५७ थियो । 

नेपाल प्रिमियर लिग (एनपीएल) मङ्सिर १५ देखि पुस ६ गतेसम्म त्रिवि मैदान कीर्तिपुरमा हुनेछ । नेपाल क्रिकेट सङ्घ (क्यान) को आयोजनामा हुन लागेको प्रतियोगितामा आठ वटा फ्रेन्चाइज टोलीको सहभागिता रहनेछ ।