लुम्बिनी प्रदेशको राजधानी दाङबाट औपचारिक कार्यसञ्चालन भएको घोषणा

कपिलवस्तु । लुम्बिनीका प्रदेश प्रमुख अमिक शेरचनले स्थायी राजधानी दाङको भालुवाङमा आधुनिक शहरको निर्माणका लागि सुनौलो अवसर प्राप्त भएको बताएका छन् ।

प्रदेश राजधानीबाट औपचारिक कार्यसञ्चालन भएको घोषणा गर्न आयोजित कार्यक्रममा झण्डोत्तोलनपछि बोल्दै प्रमुख शेरचनले केही ठाउँ र केही जनताले मात्रै प्राप्त गर्ने दुर्लभ अवसर देउखुरीवासीले प्राप्त गरेको उल्लेख गरे ।

आर्थिक तथा सामाजिक रूपले पछाडि परेको देउखुरीमा स्थायी राजधानीको व्यवस्थापनसँगै आधुनिक शहर निर्माणका लागि जनताले साथ दिनुपर्नेमा जोड दिए ।

‘यहाँ वैज्ञानिक शहरको निर्माण हुनेछ । वैज्ञानिक भवनहरू बन्ने छन् । शिक्षा र स्वास्थ्यमा क्रमशः आधुनिकताका आधारमा विकास अघि बढ्नेछ,’ शेरचनले भने, ‘यसका लागि सरकारसँगै यहाँका जनताको ठूलो साथको आवश्यकता छ ।’

प्रदेश प्रमुख शेरचनले संघीयताको कार्यान्वयनका लागि तत्कालीन प्रदेशको नाम तथा स्थायी राजधानी तोक्ने तत्कालीन सरकार तथा तत्कालीन सांसदहरूलाई समेत धन्यवाद ज्ञापन गरे । देउखुरीमा स्थायी राजधानी तोकिएसँगै अस्वाभाविक रूपमा यहाँको जग्गाको मूल्य वृद्धि भएकोप्रति सचेत गराउँदै उनले त्यसको नियन्त्रण गर्नुपर्ने उल्लेख गरे ।