इदको सार्वजनिक विदा भोलि हो ? यस्तो छ मुस्लिम आयोग र गृह मन्त्रालयको जवाफ

काठमाडौं । इस्लाम धर्माबलम्बीहरुको प्रमुख पर्व इदको अवसरमा सार्वजनिक विदा दिनेबारेमा गृह मन्त्रालय आइतवार कार्यालय समय सकिने बेलासम्म पनि अनिर्णित देखिएको छ ।

मुस्लिम आयोगले आधिकारिक रुपमा पत्र पठाएर विदाको आग्रह गरेपछि मात्र गृह मन्त्रालयले सार्वजनिक विदाको सूचना जारी गर्ने गृह प्रवक्ता रामचन्द्र तिवारीले बताए । आयोगले पत्र पठाएको १० मिनेटभित्र सूचना जारी हुने उनले जानकारी दिए ।

यता मुस्लिम आयोगका अध्यक्ष समिम मिया अन्सारीले भने साँझ ७ बजेभित्र चन्द्रमा हेरेरमात्र विदाको लागि गृह मन्त्रालयलाई पत्राचार गर्ने बताए । उनका अनुसार भोलि नै सार्वजनिक विदा हुनेछ ।

साउदी अरबलगायत देशमा हिजै इद मनाइसकेको र नेपालमा एक दिन पछि हुने भएकाले आज साँझको चन्द्रमा हेरेर विदाको सूचना जारी हुने अन्सारीले बताए ।

सरकारले मन्त्रिपरिषद बैठकबाट इदमा सार्वजनिक विदा दिने निर्णय गरिसकेको छ । आयोगको पत्रपछि मन्त्रालयले सूचना जारी गर्नेछ । आज साँझसम्म सार्वजनिक विदाको औपचारिक सूचना जारी हुने बताइएको छ ।