माओवादीको केन्द्रीय कमिटीमा २० प्रतिशतयुवाको प्रतिनिधित्व अनिवार्य

काठमाडौं ।

नेकपा माओवादी केन्द्रको आठौं महाधिवेशनको बन्दसत्रमा केन्द्रीय कमिटीको संख्या २९९ सदस्यीय बनाउने प्रस्ताव पेश भएको छ ।

पार्टी स्थायी कमिटी सदस्य देवप्रसाद गुरुङबाट पार्टीको विधान मस्यौदा प्रस्तुत गर्दै १५ जनाको पदाधिकारीसहित केन्द्रीय कमिटी २९९ सदस्यीय रहने प्रस्ताव पेश गरेका हुन् ।

उनको प्रस्तावमा बन्दसत्रमा छलफल भएर संशोधनसमेत हुन सक्ने माओवादी केन्द्रका नेताहरूले बताएका छन् ।

गुरूङले पेश गरेको प्रस्तावअनुसार अध्यक्ष, वरिष्ठ उपाध्यक्ष, उपाध्यक्ष ६ जना, महासचिव, उपमहासचिव दुई जना, सचिव तीन जना र कोषाध्यक्ष गरी १५ सदस्यीय पदाधिकारी रहने भनिएको छ ।

केन्द्रीय कमिटीमा महिलाको ३५ प्रतिशत, दलितको १५ प्रतिशत, मुस्लिमको ५ प्रतिशत प्रतिनिधित्व हुने व्यवस्था पनि गुरूङले प्रस्ताव गरेका छन् । सबै समूहबाट ४० वर्ष मुनिका युवाको २० प्रतिशत प्रतिनिधित्व अनिवार्य गर्ने प्रस्ताव गरिएको छ ।

त्यसबाहेक केन्द्रीय कमिटीले १० प्रतिशत मनोनीत गर्ने प्रस्ताव गुरूङले बन्दसत्रमा पेश गरेका छन् । पदाधिकारी र सबै तहका कमिटीहरूमा समावेशी प्रतिनिधित्व सुनिश्चित हुनुपर्ने गुरूङले पेश गरेको विधान संशोधन प्रस्तावमा उल्लेख छ ।