रेकर्ड फर्जी गरेको भन्दै एयर इन्डिया एक्सप्रेसलाई चेतावनी

भारतको उड्डयन नियामकले गएको मार्चमा एयर इन्डियाको एयरबस ए३२० को इन्जिनका पार्टपुर्जा समयमै परिवर्तन नगरेको र नियम पालना गरिएको देखाउन रेकर्ड फर्जी गरेको भन्दै चेतावनी दिएको एक सरकारी मेमोले देखाएको छ ।

एयर इन्डिया एक्सप्रेसले रोयटर्सलाई आफूले भारतीय नियामकसमक्ष त्रुटि स्वीकार र सुधारात्मक कार्य तथा रोकथामका उपाय गरेको प्रतिक्रिया दिएको छ । शुक्रबार रोयटर्सको समाचारमा युरोपेली संघको एजेन्सीले यो विषयको अनुसन्धान गर्ने जनाएको छ ।

गएको जुनमा अहमदाबादमा बोइङ ड्रीमलाइनर दुर्घटना हुँदा २४१ जनाको मृत्यु भएको थियो । त्यसपछि एयर इन्डियाको तीव्र निगरानी गरिएको छ । 

एक दशकयताकै विश्वको सबैभन्दा खराब उड्डयन दुर्घटना मानिएको त्यसको  अनुसन्धान अझै जारी छ । एयर इन्डिया एक्सप्रेसको एयरबसको इन्जिनबारे समस्या मार्च १८ मा औँल्याइएको थियो । दुर्घटनाभन्दा त्यो धेरै महिनाअघि हो ।

तर, नियामक संस्थाले यो वर्ष एयर इन्डियालाई तीन एयरबस विमानमा आपत्कालीन स्लाइडको म्याद नाघेको जाँच र जुनमा पाइलटको डिउटी समयको गम्भीर उल्लंघन गरेको भन्दै चेतावनी दिएको छ ।

एयर इन्डिया एक्सप्रेस टाटा समूहको स्वामित्वमा रहेको एयर इन्डियाको सहायक कम्पनी हो । योसँग ११५ भन्दा बढी विमान छन् । र, ५० भन्दा बढी गन्तव्यमा दैनिक ५०० उडान सञ्चालन छ ।

युरोपेली संघ उड्डयन सुरक्षा एजेन्सीले सन् २०२३ मा सीएफएम इन्टरनेसनल एलईएपी–१ ए इन्जिनमा सम्भावित असुरक्षित अवस्था सम्बोधन गर्न एक ‘एयरवर्थिनेस’ निर्देशिका जारी गरेको थियो । केही उत्पादन त्रुटि फेला परेका कारण यसमा इन्जिन ‘सिल’ र घुम्ने पार्टपुर्जाजस्ता कतिपय ‘कम्पोनेन्ट’ बदल्न निर्देशन दिइएको थियो ।